Прычины нестанья прокураторовъ, ижъ то имъ, сторонамъ ихъ шкодити не будеть.

 

Тежъ уставуемъ, ижъ кгды бы прокураторъ передъ рокомъ права, не могучи стороне своей о хоробе своей дати знати, ижбы иншого на его местце послалъ, або, едучи вжо на дорозе албо и на местцу будучи, где роки отправуют, рознемогъся обложною хоробою такъ, жебы на рокъ до суду самъ быти не могъ, тогды такъ стороне той, чию справу на себе взялъ в речахъ тыхъ, такъ тежъ и прокуратору ничого шкодити не маеть. А хотя бы другие роки остатъние або рокъ завитый былъ, предъсе тымъ ничого тратити не будеть. А ведь же прокураторъ в той хоробе скоро се рознеможет, маеть до вряду того, до которого была его сторона з моцъю отправила, и тежъ стороне противной дати знати, а объмогшися потомъ на перъшых рокохъ земъскихъ або рочкохъ кгродских, перед которым судомъ тая справа точытися будеть, маеть прысегнути, ижъ справедливе за обложною хоробою на тотъ часъ становитися не могъ, а не ку зволоце справедливости. Такъ тежъ слуги и пасланцы [так!] от пановъ, которыхъ бы до суду на роки посланых зъ якою обмовою правною у дорозе або и на местъцу судовомъ хороба великая обложная зашла, по тому жъ будеть ся заховати повинъни, яко вышей описано. А ведь же если бы прокураторъ албо слуга, посланець таковый о хоробе своей давати ведати, або и давши вряду на перъшихъ рокохъ ведати, а потомъ на другихъ рокохъ, на том же вряде черезъ сторону свою постановенъ не былъ, албо пакъ и ставшы, а прысегнути на томъ, ижъ за хоробою на перъвшыхъ рокохъ не становилъся [в оригинале: «не станововился»], не хотелъ, тогды вряд на перъвшыхъ рокохъ за неданьемъ знати о хоробе, такъ тежъ на другихъ за невчиненьемъ такое прысеги маеть стороне противной сказанье чинити водлугъ сего статуту. Инъде такая объмова хоробою прокураторъскою албо которого посланьца станеться у суду земъского за позвы перъвшыми на року перъшом не завитомъ, а потомъ на другихъ рокохъ такий прокуратор альбо посланецъ ставленъ не будеть, або и ставшы, не присягнеть, тогды тая сторона за оные перъвшые роки земские нестаное такъ, яко бы самъ не сталъ, заплатити, а стороне своей противной вжо на тыхъ другихъ рокохъ, яко на завитомъ року, усправедливитися будеть виненъ. А будет ли такая обмова хоробою вчинена на якомъ року завитомъ, такъ земъскомъ, яко и кгродъскомъ, а на другихъ рокохъ такий прокураторъ або посланецъ не станеть або и ставши не присягнеть, тогды таковая сторона за оное перъвшое нестанье свое на року завитомъ речъ, о которую позовъ идеть, тратити маеть без жадныхъ доводовъ стороны своее противное. А пакли бы сторона позваная поведила, ижъ тотъ прокураторъ его, от него посланый, передъ тымъ рокомъ, не доехавши того вряду, умеръ, тогды сама сторона таковая, не могучы вжо за тымъ того прокуратора своего на другомъ року становити, маеть на томъ самъ присегнути, ижъ тотъ прокураторъ его на тотъ рокъ былъ от него посланъ, а онъ, не доехавъшы того вряду, умеръ. И кгды на том присягнеть, судъ маеть ся противко ему водле сего арътыкулу заховати. А естли бы сама сторона позваная на другомъ року не стала албо ставъши на томъ присегнути не хотела, тогъды, естли бы о завитый рокъ шло в той речы, вжо на томъ другомъ року упадываеть; а естли не о завитый рокъ - тогды в нестанъное упадываеть.

 

Артыкулъ 61.

Чого прокураторъ без стороны своее справовати не можеть.

 

Тежъ уставуемъ, ижъ прокураторъ за моцъю жадныхъ записовъ новыхъ и никоторого вызнанья ни от кого не маеть у суду чинити и п[е]н[е]зей за записами брати, и з нихъ квитовати, не маючы при собе стороны своее. А ведъ же естли бы хто, не могучы або не поспеючы до вряду ехати по пенези, хотелъ черезъ кого иного пенези тые брати и квитовати, тогды иначей не маеть, ани можеть брати, только через такового прокуратора або слугу своего, кому бы особливую на то моцъ и порученье листомъ своимъ, подъписанымъ рукою своею и подъ печатью своею далъ, албо передъ врядомъ близшимъ судовымъ поручилъ и выписомъ того вряду моцнымъ его на то меновите учинилъ; таковый моцный можеть пенези брати и квитовати моцъ мети будеть.

 

Артыкулъ 62.