Хто бы на кого передъ правомъ словомъ або рукою сягнулъ, пхнулъ, або ранилъ, або забилъ.

Тежъ уставуемъ: коли бы хто, якого колвекъ достоенъства и стану будучы, а стоячы передъ судомъ, отступившы речи своее, одинъ на другого словомъ ся неучъстивымъ торъгнулъ, тогды за то маеть з сказанья того суду место вины седЪти на замъку ближшомъ шесть недель. А если бы пхнулъ або рукою ударил, хотя бы не ранилъ, тогды маеть заплатити стороне место навезки кгвалту дванадъцать рублей грошей, и за вину маеть седети шесть недель. А если якую справу у того суду мети будеть тотъ, кто таковое везенье заслужить, тогды маеть то везенье подняти по росправе своей речи. Пакли бы корда, меча албо шабли и якое колвекъ брони в обычай звады добылъ, а хотя бы и не ранилъ, руку тратить. А кгды бы ранилъ, тогды ничимъ инъшимъ, одно горломъ маеть быти коранъ [так!] и о такий учинокъ кождый врядъ, будь кгродский або земъский, перед которымъ се то станеть, такового можеть на горло сказати. А если бы хто кого передъ судомъ забилъ, тотъ честь и горло тратить, а головъщина з ыменья або маетности его совито маеть быти детем або близъскимъ плачоно. А такового явного выступцу пры горачом учинку не толко врядъ тотъ повинъне имати казати маеть, але и всимъ тамъ будучымъ для завъстегненья такового своволеньства, яко против взрушителя покою посполитого повъставшы, противъ таковому помочъ чынити волно будеть. А где бы таковый, змоцнившися, имати себе не далъ и от вряду зышолъ, тогды противъ таковому вряды наши заховатися мають водлугъ артыкулу трыдъцать второго сего жъ розделу. Вед же хто бы своволне далъ прычину словы и рукою и початокъ учинилъ, а тотъ бы, ув обороне прымушоный, початкомъ его брони добылъ, ранилъ або забилъ, таковый за выводомъ слушнымъ иманъ быти не маеть и таковое покуты и каранья не виненъ теръпети. А хъто бы тежъ кольве, ранившы албо забившы кого передъ судом, прочъ утекъ, по такового за даньемъ намъ о томъ знати черезъ тотъ врядъ нашъ, передъ которымъ бы ся то стало, маемъ казати манъдат нашъ дати, и станет ли за манъдатомъ, карати его водлугъ сего арътыкулу. А естли за мандатомъ нс станеть, тогды его маемъ казати со всихъ паньствъ нашихъ выволати вечнымъ выволаньемъ, яко бы ся николи в границы паньства нашого не ворочалъ, а ранъному навезъка, або забитого головщина з ыменья его маеть быти плачона. Где бы тежъ хто такъ упоръный былъ, жебы, не росправившисе в такой речи, прочъ уехалъ албо за сказаньемъ врядовымъ везенья подъняти и кгвалту верху менованого стороне обельжоной заплатити не хотелъ, а врядъ бы его не могъ до того везенья примусити, а онъ бы проч от вряду от[ъ]ехалъ, досыть тому, во што попалъ, не вделавшы, тогды тотъ урядъ, передъ которымъ ся то станеть, за такое его непослушеньство маеть стороне ображоной кгвалтъ тотъ совито, а собе вряду вины сорокъ копъ грошей на имен[ь]ю его заразомъ, безъ жадныхъ роковъ, отправити, поступуючи далей около тое отправы водлугъ артыкуловъ, о отправахъ речей сужоныхъ описаныхъ.

Артыкулъ 63.

О томъ, где бы воевода, староста або судья, подъсудокъ и писаръ, такъ замъковый, яко и земъский врядъ або подкоморий, комисаръ, седечы на суде, кого соромотилъ, або ся на кого рукою торъгнулъ.

Тежъ уставуемъ, ижъ кгды бы хто с тыхъ вышей мененыхъ врядниковъ нашихъ, седячы на суде, кого словы неучъстивыми соромотилъ, тогды тотъ такий врядникъ за доводом явным слушнымъ маеть на замъку шесть недель седети. А если ж бы который воевода, староста або который зъ ихъ врядняков судовыхъ кгродъскихъ, албо тежъ судья, подъсудокъ, писаръ земъский, або подъкоморый, альбо комисаръ сам кгвалтъ местъцу нашому, г[о]с[по]д[а]ръскому, и суду учинилъ, а кого на суде ранилъ, таковый врядникъ горъло тратить. А пакли бы забилъ, таковый горъло и честь тратить, а навезка або головщина зъ именья его совито маеть быти плачона. А о то укрывжоной стороне такого врядника волно будеть позвати на рокъ завитый до насъ, г[о]с[по]д[а]ра. Ведъ же хто бы свовольне далъ вряду причину, словы и рукою торъгнулъся и початокъ учинилъ, а тотъ врядникъ, въ обороне прымушоный, початкомъ его брони добылъ, ранилъ або забилъ, таковый за слушнымъ выводомъ от тое вины и каран[ь]я воленъ будеть.