Бiздiң елiмiз мен айтқан перспективаларға қол жеткiзуi үшiн мынадай ұзақ мерзiмдi жетi басымдықты iске асыру қажет:
1. Ұлттық қауiпсiздiк. Аумақтық тұтастығын толық сақтай отырып, Қазақстанның тәуелсiз егемен мемлекет ретiнде дамуын қамтамасыз ету.
2. Iшкi саяси тұрақтылық пен қоғамның топтасуы. Қазақстанға бүгiн және алдағы ондаған жылдар iшiнде ұлттық стратегияны жүзеге асыруға мүмкiндiк беретiн iшкi саяси тұрақтылық пен ұлттық бiртұтастықты сақтап, нығайта беру.
3. Шетел инвестициялары мен iшкi жинақталымдардың деңгейi жоғары ашық нарықтық экономикаға негiзделген Экономикалық өсу. Экономикалық өрлеудiң нақтылы, тұрлаулы және барған сайын арта түсетiн қарқынына қол жеткiзу.
4. Қазақстан Азаматтарының денсаулығы, бiлiмi мен әл-ауқаты. Барлық қазақстандықтардың өмiр сүру жағдайларын, денсаулығын, бiлiмi мен мүмкiндiктерiн ұдайы жақсарту, экологиялық ортаны жақсарту.
5. Энергетика ресурстары. Мұнай мен газ өндiрудi және экспорттауды қалыпты экономикалық өрлеу мен халықтың тұрмысын жақсартуға жәрдемдесетiн табыс алу мақсатында жедел арттыру жолымен Қазақстанның энергетикалық ресурстарын тиiмдi пайдалану.
6. Инфрақұрылым. Әсiресе Көлiк және байланыс. Осы шешушi секторларды ұлттық қауiпсiздiктi нығайтуға, саяси тұрақтылық пен экономикалық өрлеуге жәрдемдесетiндей етiп дамыту.
7. Кәсiби мемлекет. Iсiне адал әрi бiздiң басты мақсаттарымызға қол жеткiзуде халықтың өкiлдерi болуға қабiлеттi Қазақстанның мемлекеттiк қызметшiлерiнiң ықпалды және осы заманғы корпусын жасақтау.
Осы ұзақ мерзiмдi басымдықтардың әрқайсысы үшiн бiз бiр жылдық, үш, ал кейiннен бес жылдық жоспарларда белгiленген нақты iс-қимылдарға күш-жiгерiмiздi жұмылдыра отырып бiз стратегиямызды талдап жасауға және оны дәйектi түрде iске асыруға тиiспiз.
Осы ұзақ мерзiмдi басымдықтар мемлекет пен бiздiң азаматтарымыздың күш-жiгерiн жұмылдыру үшiн қызмет етуге, елiмiздiң бюджетi мен кадр саясатын қалыптастыру кезiнде өлшемдер негiзiне алынуға тиiс.
